成功需父幹? 偉倫的故事,沒有奇蹟,卻有無盡的愛! 昔日院童變今日家舍爸爸:冰山好厚 要慢慢溶
![](https://www.ech.org.hk/wp-content/uploads/2020/09/ah38h-34gop.jpg)
網絡世界愛揶揄別人「成功需父幹」,不過對於在兒童之家長大的偉倫來說,卻只能靠自己苦幹。可幸單打獨鬥卻不孤單,那一碗寂靜晚上的腐竹白果糖水,事隔多年仍然香甜。「以前住喺呢度,Onson哥係家長,依家到自己做埋家長,感覺好奇妙」。他口中的Onson哥,正是在兒家工作了33年的家舍爸爸余國安,由昔日院童到成為同事,輸在起跑線卻沒輸掉整個人生,偉倫的故事,沒有奇蹟,卻有無盡的愛。
「好難將冰山一下子劈開,要慢慢溶,因為啲冰好厚,劈唔開」。父母離世,年老嫲嫲無力照顧,偉倫的故事,在兒家,很尋常。轉校讀中一、獲社署安排入住兒家,5年的中學生活,都在這裏渡過。「頭一年,真係唔出聲」。時年12,是但求其你話事。「試過帶佢出去食食車仔麵,佢話唔識揀」。Onson哥話當年,坐在一旁的偉倫,忙不及搶白:「由細到大習慣冇得揀吓嘛」。「其實,佢唔係真係咁隨和囉」。儼如歡喜冤家的「兩父子」相視大笑。
那是1991年,轉校,住進院舍,過六時起床九時熄燈的紀律生活,那座冰山,因為一碗糖水,溶化了一角。「佢同羅姑娘(院長羅美珍)唔同,唔係特別多嘢講,外表好cool,但會用嘢食浮虜你」。週日,勉強有家可歸的院童都回家,偉倫記得,愛下廚的Onson哥總會煲糖水請大家食。「佢會做好多額外嘅嘢,我最記得,嚟咗呢度幾個月,攞咗個咩好學生獎,有通告俾佢簽名,以為係例行公事,點知佢執到正嚟睇」。都是微不足道的小事,但點點滴滴,十幾年過去,總在心頭。
坐在一旁的Onson哥沒出聲,聞言是看得出的冧。在這裏33年,離開了又回來,這個柔情鐵漢說,兒家的孩子來了又走,但他早已視這裏是他的第二家。「係我叫偉倫返嚟幫手,喺呢度長大嘅大哥哥返嚟照顧佢哋,就好似看到自己嘅未來」。希望之火,大扺是絕望孩子的一點光。外冷內熱的Onson哥說,孩子來了又走,他相信每個人都可選擇自己想過的人生。「成長步伐每個人都唔同,一定要有耐心」。慢慢溶化了的冰山,山後原來風光如畫,活出第二人生的偉倫看到了,其他人又如何?
記者:呂麗嬋 《蘋果日報》https://hk.appledaily.com/local/20161203/PSUV2QQCWM66OZMSEXIZ5PNLNU/